Գրքի երևանյան 6-րդ փառատոն․ ինչի՞ն ուշադրություն դարձնել

Գրքի 6-րդ փառատոնը տեղի կունենա մայիսի 25-27-ը՝ Սունդուկյանի անվան ազգային ակադեմիական թատրոնում: Բուքֆեստն այս տարի ստացել է միջազգային կարգավիճակը, այնպես որ կլինեն նաև օտար հյուրեր: Փառատոնային ծրագրը հագեցած է շնորհանդեսներով, քննարկումներով, զրույցներով, հանդիպումներով ու համերգներով, որոնց բոլորի մուտքը, իմիջիայլոց, ազատ է: Եվ, ամենակարևորը, բոլոր երեք օրերին գործելու է 20-50 տոկոս զեղչ: 

Այս տարվա գրքի փառատոնի պաստառը ձևավորել է Վիլյամ Կարապետյանը

25.05 | 15:00. Վաչե Սարգսյան. «Ակեղդամա» գրքի շնորհանդես

Հովհաննիսյան ինստիտուտը  ներկայացնում է խորհրդահայ գրող Վաչե Սարգսյանի «Ակեղդամա» անտիպ գործի հրատարակությունը: Փառատոնում կներկայանցվեն այս եռահատոր վեպի առաջին երկու գրքերը՝ «Անկրկնելի պատմություն» և «Հավերժական սառածություն. Նամակներ Սոնյա Կարոլին»: Սիրանուշ Դվոյանը և Նարե Սահակյանը, որոնք ուսումնասիրել են վեպը, կներկայացնեն խորհրդահայ ճամբարային գրականությունը տարբեր կողմերից` անդրադառնալով վեպի տարբերակներին, հրատարակության խնդիրներին:

25.05 | 18:00 Հանդիպում Տատյանա Տոլստայայի հետ

Գրականագետ Լիլիթ Մելիքսեթյանը կզրուցի ռուս գրող, հրապարակախոս, մանկավարժ, լրագրող և գրականագետ Տատյանա Տոլստայայի հետ: Հեղինակի՝ «Նրանք նստել էին ոսկե պատշգամբում...» պատմվածքը մեծ արձագանք ունեցավ և ջերմորեն ընդունվեց թե՛ ընթերցողների, թե՛ քննադատների կողմից, ապա և ճանաչվեց 1980-ականների լավագույն գրական դեբյուտներից մեկը։ Կծավալվի քննարկում, հանդիսատեսը ևս կկարողանա ուղղել իրեն հետաքրքրող հարցերը:

25.05 | 19:00 Համերգ. Լավ էլի

Իհարկե, հավաքվել են գրքի սիրահարներ ու ընթերցողներ, որոնք սիրում են լսել նաև որակյալ երաժշտություն, ուստի փառատոնի բացման առաջին օրվա ավարտը կազդարարվի գուցե ամենասիրված հայակակն խմբի տրամադրությամբ:

26.05 | 14:00 Բանաստեղծությունը՝ բացված․ պոետիկ արտահայտման հետմիջօրե․ Շենոն Սալիվան և Յորղոս Կուտուվելաս | Վերսոպոլիս 

Փառատոնի միջազգային կարգավիճակի ևս մի դրսևորում․ այս, ինչպես պնդում են կազմակերպիչները, շատ գեղեցիկ միջոցառման հյուրերն են հայտնի բանաստեղծներ Շենոն Սալիվանը Գերմանիայից և Գիորգոս Կուտուվելասը Հունաստանից: Միջոցառման ժամանակ կընթերցվեն բանաստեղծությունները հայերեն, կլինի հարց ու պատասխան հանդիսատեսի հետ: 

26․05 | 16:00 Վահրամ Ալազան. «Տառապանքի ուղիներում» հուշագրության շնորհանդես

Ստալինյան բռնությունների լավագույն վկայագրություններից մեկը համարվող այս գրքում նկարագրված է ժամանակի դաժան մթնոլորտը, հատկապես մշակույթի ասպարեզում։ 1930-1950-ական թվականների բանտերի ու աքսորների սարսափը վկայագրած կարևորագույն այս գիրքը ժամանակին մնացել է անտիպ, և հրատարակվել միայն 1990 թվականին, բայց չափազանց շատ կրճատումներով, մկրատումներով, խմբագրումներով: 

Ներկա հրատարակությունը պատրաստված է հեղինակային մեքենագիր օրինակի հենքով, և, ըստ էության, ամբողջությամբ ու անխաթար հրատարակվում է առաջին անգամ: Հրատարակության է պատրաստել գրականագետ Արքմենիկ Նիկողոսյանը: Նա էլ կներկայացնի գիրքը՝ գրողի դստեր, Հասմիկ Ալազանի հետ։ 

 

26.05 | 19:30 Հանդիպում Արմեն Զախարյանի հետ (Մեծ դահլիճում)

Գրականության մասին լավագույն ռուսալեզու պոդկաստներից մեկի՝ «Արմեն և Ֆյոդորի» հեղինակ Արմեն Զաքարյանն այս անգամ կխոսի հայ ու համաշխարհային գրականության մասին: Դասախոսությունից հետո ծավալվելու է ակտիվ զրույց, որը կվարի գրականագետ Լիլիթ Մելիքսեթյանը,  հարցեր կարող է հղելը նաև հանդիսատեսը։ Կարևոր հավելում՝ հանդիպման մուտքը առավելագույնը տասը տարվա հնության գրքով է․ հավաքված գրքերը կդառնան գյուղերից մեկի համար փոքրիկ գրադարան:

27.05 | 15:00 Մոգականություն և ռեալիզմ․ Մարիամ Պետրոսյան, Ալեքսանդրա Շալաշովա

Ժամանակին ռուսական գրականությունը ցնցած «Տունը, որում․․․» վեպի հեղինակ, երևանցի Մարիամ Պետրոսյանն ու ռուսաստանցի Ալեքսանդրա Շալաշովան կքննարկեն գրականության մեջ տեղ գտած  երկու ծայրահեղությունները՝ ռեալիզմն ու մոգականությունը: Հատկապես Մարիամ Պետրոյսանը հաճախ չի հանդես գալիս հանրության առջև, այնպես որ լավ առիթ է նրան լսելու (ինչպես նաև ծանոթանալու իր ռուսալեզու վեպի վերջերս լույս տեսած հայերեն տարբերակի հետ)։

27.05 | 16:00 Ժամանակակիցը, ժամանակավորը և անժամանակը պոեզիայում. Կարեն Անտաշյան, Հասմիկ Սիմոնյան, Մարինե Պետրոսյան

Ինչպե՞ս է ժամանակակից գրողը պահպանում իր ժամանակակից լինելն այսօր, որպեսզի տեքստը չդառնա ժամանակավրեպ, ասելիքը հին կամ անընկալելի: Ժամանակի ու տեքստի հարաբարեության, ժամանակի ազդեցության ու տեքստի կարևորության մասին կզրուցեն վերջին տարիներին հայկական պոեզիայի ամենավառ ներկայացուցիչներից երեքը՝ Հասմիկ Սիմոնյանը, Մարինե Պետրոսյանն ու Կարեն Անտաշյանը: 

27.05 | 18:00 Արամ Պաչյանի «Եթե սա գրող է» գրքի շնորհանդես | Էջ

Գրեթե երեք տարվա դադարից հետո Արամ Պաչյանը ընթերցողին է հանձնում նոր գիրք՝ «Եթե սա գրող է»: Գրքում տեղ են գտել վերջին տարիներին գրված ստեղծագործությունները. էսսեներ, պատմվածքներ և այլն: Բովանդակության կարևոր կետերն են Արցախյան 1-ին և 2-րդ պատերազմները, երկրաշարժը, համավարակը, Երևանի և առհասարակ ուրբանիստական հիշողությունը հեղինակի ընկալմամբ։ Գրելու արվեստի, լեզվական փոփոխությունների գրող լինելու ու ասելիքի մասին կպատմի հեղինակը:  

Գիրքը կվաճառվի քսան տոկոս զեղչով: 

19:00 Գրական մրցույթի ամփոփում (Մեծ դահլիճում)

Ամենամյա մշտական ամփոփումը: Հեղինակներն արդեն ժյուրիին են ներկայացրել իրենք ստեղծագործությունները՝ արձակ, պոեզիա, դրամատուրգիա, մանկապատանեկան գրականություն: Փառատոնի ավարտը կազդարարի մրցանակաբաշխությունը, կհնչեն այս տարվա հաղթողների անունները: Իսկ հաջորդ փառատոնին, գուցե արդեն ներկայացվեն այդ հաղթող աշխատանքները՝ հրապարակված վիճակում։