Եվրասիադոկ 2023
Հուլիսի 8-ին ժամը 12։00-ին ՀԲԸՄ-ի դահլիճում տեղի կունենա «Եվրասիադոկ 2023 վավերագրական ֆիլմերի զարգացման աշխատարանի» բացման արարողությունը։
07.07.2023Եվրասիադոկ ծրագիրը 10 տարուց ավել իր մեծ ներդրումն ունի վավերագրական ֆիլմերի ոլորտում Արևելյան Եվրոպայի երկրներում՝ մասնավորապես Հայաստանում։ Այս տարիների ընթացքում աշխատարաններին մասնակցել են տասնյակ հայ կինոգործիչներ, որոնց ֆիլմերը և նախագծերը ներկայացվել են բարձրակարգ կինոփառատոններում և կինոշուկաներում։ Միայն 2016 թվականից մինչ օրս դասընթացներին մասնակցած 34 նախագծերից, համատեղ արտադրության ֆորումներին անցել և մասնակցել է 24 նախագիծ։ Այս պահի դրությամբ 10 ֆիլմ հաջողությամբ ավարտված է, եվս 16-ը զարգացման, արտադրության կամ հետ արտադրական փուլերում են։
Ներկա են լինելու Հայաստանում Ֆրանսիայի դեսպանատանը կից գործող նորաբաց Ֆրանսիական Ինստիտուտի ղեկավար Դեվիդ Թոուրսը և մշակույթային ծրագրերի ղեկավար Ալեքսանդր Կլուզոն, դասընթացավարներ՝ Սամյուել Օբինը և Ստեֆան Ժորդանը, ընտրված բոլոր մասնակիցները և ուրիշներ։ Ելույթ կունենան հյուրերը, ծրագրի Հայաստանյան ներկայացուցիչը՝ պրոդյուսեր Արևիկ Ավանեսյանը և դասընթացավարները։
«Եվրասիադոկ 2023 վավերագրական ֆիլմերի զարգացման աշխատարանը» տեղի է ունենալու հուլիսի 5-10-ը Երևանում, այնուհետև աշխատանքները կշարունակվեն առցանց տարբերակով մինչ սույն թվականի աշուն։ Դասընթացի ավարտին՝ նոյեմբեր ամսին, կընտրվեն լավագույն 2 կամ 3 նախագիծ, որոնք կմասնակցեն 2024 թվականի ապրիլին Ղազախստանում անցկացվող համատեղ արտադրության ֆորումին՝ ներկայացնելու Հայաստանը։
Եվրասիադոկը Հայաստանում գործում է ավելի քան 10 տարի, բայց այս տարի աշխատարանը տարբերվում է նախորդներից, քանի որ առաջին անգամ մասնակցում են ստեղծագործական թիմեր՝ ռեժիսոր և պրոդյուսեր միասին, որոնց վավերագրական նախագծերը զարգացման փուլում են (նախկինում մասնակցում էր միայն ռեժիսորը, աշխատում էին հիմնականում սցենարական զարգացման ուղղությամբ) և հետևաբար աշխատանք է տարվելու ոչ միայն սցենարի վրա, այլ նաև արտադրական մասի և պրոդյուսերական կողմի վրա։ Նորություն է նաև այն, որ աշխատարանին առաջին անգամ ընտրվել են մասնակցելու ազատ ունկնդիրներ։
Դասընցավարները պրոֆեսիոնալ կինոգործիչներ են Ֆրանսիայից՝ սցենարիստ, գրող, ռեժիսոր, պրոդյուսեր Սամյուել Օբին, և պրոդյուսեր, La Huit ընկերության տնօրեն Ստեֆան Ժորդանը։ Նրանք արդեն Հայաստանից նախագծերի հետ աշխատելու տարիների փորձ ունեն։
Այս տարվա ծրագրում ընդգրկվել է նաև դասընթացին մասնակցած և ավարտված 6 ֆիլմերի հետահայաց ցուցադրություն, որոնք կլինեն սեպտեմբեր-հունվար ամիսների ընթացքում՝ ՀԲՄԸ դահլիճում։
Ծրագիրը ֆինանսավորել են Ֆրանսիական Ինստիտուտը Փարիզից, Լա Իսերե կազմակերպությունը Ֆրանսիայից և Ֆրանսիական Ինստիտուտի նորաբաց Երևանյան գրասենյակը, կազմակերպիչ կողմերն են «Դոկմոնդը» և «Էկրան Լիբրեն» Ֆրանսիայից և «ԱՓ» ՀԿ-ն Հայաստանից։ Ծրագրի աջակիցներն են՝ ՀԲԸՄ-ն, Միրզոյան գրադարանը և Կինոգործիչների միությունը։ Աշխատարանն անցկացվում է GAIFFpro-ի հետ համագործակցությամբ Ոսկե Ծիրան Երևանյան միջազգային կինոփառատոնի օրերին։
Ծրագրին աջակցում են նաև «Օսկուլատուս ա Դեո» գինիները, «Արտ Բրիջ» գրախանութ-սրճարանը և «Բարս Մեդիա» Վավերագրական ֆիլմերի ստուդիան։
