Գիրք նվիրելու օր 2025․ ուղեցույց

Գիրք նվիրելու օրը Բուկինիստում

Փետրվարի 14, 15 և 17 | Բուկինիստի մասնաճյուղերում

Փետրվարի 14-ին, 15-ին և 17-ին Բուկինիստի գրքասերներին կսպասարկեն հայտնիները՝ տարբեր ժամերի։ Նրանք խորհուրդ կտան գրքեր, որոնց համար կգործի 20 տոկոս զեղչ։ Գրքի Ձեր խորհրդատուները կլինեն՝ Արքմենիկ Նիկողոսյանը, Գնել Նալբանդյանը, Ներսես Ավետիսյանը, Դավիթ Հակոբյանը և այլ բանիմաց մարդիկ։ Ընդ որում, իրենց առաջարկած գրքերի համար գործելու է 20% զեղչ։ Պատանի գրքասերներին իրենց խորհուրդներով կօգնեն տարեկիցները։ 

ԿարդաLove փառատոն My Bookstore-ից

Փետրվարի 15 և 16 | Էլիտ պլազա

Փետրվարի 15-ին և 16-ին տեղի կունենա My Bookstore-ի կազմակերպած ԿարդաLove երկօրյա փառատոնը Էլիտ պլազա բիզնես կենտրոնում։

Փառատոնի շրջանակում տեղի կունենան հանդիպում-քննարկումներ ժամանակակից գրողների, դերասանների և ինֆլուենսերների հետ, որոնք կզրուցեն հատուկ թեմաների շուրջ, կխոսեն իրենց սիրելի գրքերի մասին, ինչպես նաև գրականությունից և արվեստից։ Տեղի կունենա 3 գրքի շնորհանդես, վարպետության դաս, հեքիաթի ժամ՝ երեխաների համար, պոեզիա և այլ հանդիպումներ։ Կգործեն 20 տոկոսից սկսած հատուկ զեղչեր` նախատեսված գրքերի համար։ 

«Գիրք ու Հոգի» Նոր գրախանութից

Փետրվարի 15 և 16 | Խաչքարերի պուրակ

Փառատոնի ընթացքում, բացի գրքերի շնորհանդեսներից կլինեն նաև այլ միջոցառումներ՝ քննարկումներ, գրքախաղ և հեքիաթի անկյուն։ Ընդ որում, այս երկու օրերին զեղչերը կգործեն նաև գրախանութի մասնաճյուղերում։

Newmag Winter Fest 

Փետրվարի 16 | Dvin Music Hall

Newmag հրատարակչությունը շարունակում է ավանդույթը՝ ներկայացնելով իր նոր հրատարակությունները գրքի և արվեստի փառատոների տեսքով։ Այս անգամվա Ձմեռային փառատոնի ընթացքում տեղի կունենա Սյունե Սևադայի, Ավետ Բարսեղյանի, Ծովինար Բարխուդարյանի, Հերմինե Ավագյանի և Գոհար Մանուկյան նոր գրքերի, ինչպես նաև Արևիկ Ուդումյանի «Դյութէ» ամսագրի նոր համարի շնորհանդես, 4 երաժշտական կատարում և գալա համերգ (փառատոնի ընթացքում ելույթ կունենան Հայաստանի սիմֆոնիկ նվագախումբը, Անահիտ Հակոբյանը, Project LA-ը), արտ-ինստալացիայի ցուցադրություն, պոեզիայի երեկո, ինչպես նաև հանդիպումներ գրողների, արվեստագետների հետ։

Փառատոնի շրջանակներում բոլոր գրքերը կվաճառվեն մինչև 40 տոկոս զեղչով: Իսկ այցելուները հնարավորություն կունենան ստանալու հեղինակային մակագրություններ և մասնակցելու քննարկումներին։

«Գիրք նվիրելու օրվա տոնավաճառ» Երևանի քաղաքապետարանից

Փետրվարի 21 և 22 | Շառլ Ազնավուրի հրապարակ

Փետրվարի 21-ին և 22-ին Երևանի քաղաքապետարանը կազմակերպում է «Գիրք նվիրելու օրվա տոնավաճառ» Շառլ Ազնավուրի անվան հրապարակում։ Ինչպես նախորդ տարիներին, նախատեսվում են առանձին տաղավարներով ներկայացող հրատարակիչներ, զեղչեր ու կենդանի երաժշտություն։ 

Բուքուբորան 

Փետրվարի 22 և 23 | Woods կենտրոն

Փետրվարի 22-ին և 23-ին Ջրվեժի Woods կենտրոնում տեղի կունենա առաջին «Բուքուբորան» գրատոնը, որի ընթացքում հնարավորություն կընձեռվի ծանոթանալու Հայաստանի առաջատար հրատարակչությունների (Անտարես, Զանգակ, Newmag և այլն) տպագիր ու էլեկտրոնային գրքերի, գեղարվեստական և մասնագիտական գրականությանը, ինչպես նաև տեքստային ու ձայնային բովանդակութունների։ Ներկայացված գրքերը հնարավոր կլինի ձեռք բերել 30 տոկոս զեղչով։

Կլինեն նաև գրական հանդիպումներ ոլորտի մասնագետների, հրատարակիչների և գրականագետների հետ։

Ցուցահանդեսներով հանդես կգան Մատենադարանն ու Գրականության և արվեստի թանգարանը, իսկ «Գրողի ծոց» սրահում ժամանակակից հայտնի գրողների հետ կլինեն հանդիպումներ։

Քանի որ Woods-ը մի քիչ հեռու է, կգործեն երկկողմանի անվճար երթուղիներ մասնակիցների համար։