Կատապուլտ Հայաստանի ստեղծարար ոլորտի համար

Մարտի երկրորդ կեսից խանգարվեց Էջմիածին գնացող վարորդների հանդարտ առօրյան, որոնք իրենց չգրված, բայց հաստատուն կայանատեղին ունեն Մաշտոց-Սարյան խաչմերուկում: Ազատ ժամանակ նրանք հետաքրքրությամբ հետևում էին ՀայԱրտ մշակութային կենտրոն տարվող անթիվ պարագաներին` շինարարակական նյութեր, բույսեր, արվեստի գործեր: Երբեմն նրանք անգամ համաձայնում էին շատ-շատ կարճ ժամանակով կիսել իրենց թանկարժեք տեղը նյութեր տեղափոխող մեքենաների հետ: Իրականում, սրանք Կատապուլտ տաղավարի` ստեղծարար ոլորտի այլընտրանքային ցուցահանդես-վաճառքի նախապատրաստական աշխատանքներն էին: Ի ուրախություն վարորդների` տաղավարը, վերջապես, բացվեց մարտի 31-ին և կշարունակի գործել մինչ ապրիլի 30-ը:

Ինչու 

Աննա Գարգարյանը` Կատապուլտ ծրագրի ղեկավարը, պատմում է, որ տաղավարի գաղափարն առաջացավ գիտակցությունից, որ Հայաստանում շատ քիչ կան հարթակներ ստեղծարար ոլորտը ցուցադրելու, և դրա պրոդուկտը վաճառելու համար: «Որոշեցինք միախառնել արվեստի շուկայի և բիենալեի կոնցեպտները. այսինքն` վաճառել գործեր, բայց ներկայացվելով դրանք որպես համադրված մոտեցումներ, ունենալ խմբակային և սուբյեկտիվ ցուցահանդեսներ ոլորտի մասնագետների կողմից»,- բացատրում է Աննան: Շուտով հայտարարվեց գաղափարների կանչ և անկախ ժյուրին ընտրեց այն վեց նախագծերը, որոնք ներկայացված էին լինելու Կատապուլտ տաղավարում:

Ինչից է բաղկացած

Այս նախագծերից յուրաքանչյուրը ներկայացված է առանձին ենթատաղավարով, որոնք կոչվում են կապսուլներ: Առաջին կապսուլը, որ նվիրված է տեսողական արվեստին` համադրված է Ժամանակակից արվեստի ինստիտուտի կողմից և ուսումնասիրում է ժամանակակից արվեստ հարաբերություններն ավանդական տեխնիկաների, օրինակ` ասեղնագործության, գորգագործության հետ: 

Կունստ հաուզը, որ համադրել է Ստեղծարար տեխնոլոգիաների կապսուլը, վերածել է իր տարածքը «Կունստ սթորի» (արվեստի խանութի), որը գործում է մետավերսում և բջջային հավելվածներ է վաճառում նկարիչ լինելու, հետմարդկային ժամանակաշրջանի լուսանկարչության և ապագայի վրա տեխնոլոգիաների ազդեցության վերաբերյալ: 

Միջոլորտային` գրքերի և ճարտարապետության կապսուլը երրորդն է, որն ուսումնասիրում է փոխհարաբերությունները քաղաքային միջավայրի և գրքերի միջև: Այն համադրված է «ԻմՊրինտ» ԶՎՈՆ ստուդիայի և Կարեն Բալյանի կողմից: 

Չորրորդ կապսուլը նվիրված է Նորաձևությանը և համադրված է Նորաձևության և դիզայնի պալատի կողմից: Այն ներկայացնում է շուրջ քսան հայկական նորաձևության ապրանքանիշներ: 

Տպագրության և գրքերի ենթատաղավարը վերնագրված է «Արվեստի անկախ հրատարակիչների կապսուլ»: Համադրված ԱՀԱ կոլեկտիվի և ՄԱՆ ԲԱՆ արխիվի կողմից` այն ներկայացնում է արվեստի և հումանիտար գիտությունների ոլորտում գործող ավելի քան 50 անկախ հրատարակիչների գրքեր, և այլ տպագրական նյութեր: 

Վեցերորդը` Կոմիքսների կապսուլն է` Պանիկ լաբը (խուճապ լաբարատորիա), որը համադրված է Թումո Ստեղծարար Տեխնոլոգիաների Կենտրոնի կողմից: Ենթատաղավարը ներկայացնում է հայ անկախ կոմիքս արվեստագետների կողմից ստեղծված բացիկներ, գրաֆիկական նովելներ և այլն: Կապսուլներում ներկայացված պարագաների մեծամասնությունը վաճառվում է:

Միջոցառումներ 

Բացի համադրված տաղավարներից, Կատապուլտն առաջարկում է նաև միջոցառումների բազմաճաշակ շարք, որոնց մի մասն արվում է այլ փառատոների կամ արդեն իսկ ներգրավված կապսուլների թիմերի հետ համագործակցությամբ: Մինչ այս ամենին զուգահեռ ՀայԱրտում ընթանում է «ԱՐԷ» կատարողական արվեստի փառատոնը, որն ունի իր առանձին և հագեցած ծրագիրը, Կատապուլտը համագործակցում է նաև «Ուրվական» փառատոնի հետ, որոնց փոքրիկ բարը դիմավորում է այցելուներին ՀայԱրտի բակում: Մինչ տաղավարներին հասնելը, հյուրերին առաջարկվում է նաև ծանոթանալ Ռուբեն Արևշատյանի կողմից համադրված ցուցահանդեսին` նվիրված հյուրընկալող շենքի պատմությանը: 

Բուն Կատապուլտի միջոցառումները բաժանվում են երեք խմբի` զրույցներ, աշխատարաններ և ներկայացումներ: Զրույցները տեղի են ունենում ամեն երեքշաբթի և բարձրացնում են ստեղծարար ոլորտի արդիական հարցերը: Աշխատարանները, որոնք ավելի մասնագիտական են, նվիրված են լինելու ճարտարապետությանը. մասնակիցները երազելու են ՀայԱրտ շենքի ապագան, ինչպես նաև մետաքսատպագրությանը: Ներկայացումները գլխավորապես երաժշտական են, և ինչպես ծրագրի մյուս միջոցառումները, բաց են բոլորի համար:

Միջոցառումների առանձին շարքով է հանդես գալիս «Արվեստի անկախ հրատարակիչների» կապսուլը, որն մի ամսվա ընթացքում հյուրընկալելու է գրքերի շնորհանդեսներ, քննարկումներ` նվիրված հրատարակչության, տառատեսակների ստեղծման առանձնահատկություններին, արվեստի գրադարաններին և այլն:

Տաղավարի շարունակությունը

Կատապուլտ տաղավարը թիմի պլանավորած գործողություններից մեկն է միայն: Աննա Գարգարյանը պատմում է, որ նախատեսվում է նաև «հանել տաղավարը դուրս», այսինքն` մասնակցել միջազգային թիրախավորված էքսպոներին և ներկայացնել Հայաստանը: «Մենք ուզում ենք, վերջապես, կապ ստեղծել միջազգային կոլեկցիոներների հետ. այստեղ շուկան շատ փոքր է», - ամփոփում է Աննան: