Կենդանիների դիմակահանդես-շքերթ

Փառատոնն այս տարի կթիրախավորի կենսաբազմազանության պահպանության թեման՝ հանրությանն իրազեկելով Հայաստանում և աշխարհում կենսաբազմազանության կորստի և դրա կանխման համար անհրաժեշտ քայլերի մասին։ 

Երիտասարդների շրջանում մտածողություն զարգացնելով կենսաբազմազանության հետ կապված արդիական խնդիրների վերաբերյալ՝ միջոցառումը նաև նպատակ է հետապնդում նրանց շրջանում գործնական հմտություններ ձևավորել թափոնների կառավարման և թափոնին «երկրորդ կյանք» տալու համատեքստում։ 

Մասնակից խմբերը նախևառաջ պետք է ուսումնասիրեն բնության մեջ վտանգված կենդանա/բուսատեսակները և ընտրելով դրանցից իրենց համար առավել հետաքրքրականները՝ թափոններից ստեղծեն գրավիչ ու բազմերանգ վերամշակված հագուստներ՝ շքերթի ժամանակ դրանցով ներկայանալու համար։

Հաստատությունը կարող է մեկ կամ մի քանի թիմերով ներկայանալ, յուրաքանչյուր թիմ ներկայացնելու է ընտրված բույսի կամ կենդանու մեկ տեսակ: Պաստառի վրա գրված բնապահպանական, ինքնատիպ կարգախոսով և իրենց պատրաստած կերպարներով մասնակիցները մոտ 1,5 ժամ կքայլեն Երևանի կենտրոնական փողոցներով: 

Շքերթին մասնակցող ամենից ստեղծարար գաղափարներն իրագործած և լավագույնս ներկայացած թիմը կստանա խրախուսական մրցանակ. անկախ ժյուրին կընտրի լավագույն թիմին, որի անդամների համար կկազմակերպվի երկօրյա բնապահպանական դպրոց՝ ուսուցողական արշավներով, աշխատարաններով ու բազմաթիվ անակնկալներով։

Օրակարգ

•    «Կենդանիների դիմակահանդեսշքերթը» տեղի կունենա 2024 թվականի մայիսի 26-ին։

•    Մասնակիցների հավաքման վայրը և ժամը՝ Ստեփան Շահումյանի անվան հրապարակ, Շահումյանի արձանի մոտ, 13:00-ին։

•    Շքերթի երթուղու մեկնարկը՝ 13:30 վերոնշյալ վայրից։

•    Շահումյանի հրապարակից շքերթը կշարժվի դեպի Ս. Շահումյանի պուրակ՝ քայլելով դեպի Հանրապետության հրապարակ։

•    Հանրապետության հրապարակում շքերթը կանի երկու շրջապտույտ, և ապա կուղևորվի Ամիրյան փողոց։

•    Ամիրյան փողոցով քայլելով՝ շքերթը կուղևորվի դեպի Մաշտոցի պողոտա՝ քայլելով դեպի Միսաք Մանուշյանի անվան պուրակ։

•    Միսաք Մանուշյանի անվան պուրակը կլինի վերջին կանգառը, որտեղ տեղի կունենա մինչև 40 րոպե տևողությամբ համերգային ելույթ, որով միջոցառումը կամփոփվի։

•    Ավարտ՝ 16:00