Թումոյի հորիզոնական երկնաքերը
ԵՄ Թումո ինժեներական և կիրառական գիտությունների համալիրի ճարտարապետական նախագիծը։
Աղբյուր՝ Թումո
Այսօր ներկայացվել է ԵՄ Թումո ինժեներական և կիրառական գիտությունների համալիրի ճարտարապետական նախագիծը, որի հեղինակն է հոլանդական հռչակավոր MVRDV ստուդիան:
Հրազդանի կիրճի եզրին գտնվող այս հորիզոնական երկնաքերը կունենա 6 հարկ և 200 մետր երկարություն` զբաղեցնելով շուրջ 17,000 ք.մ. մակերես: Համալիրը բաղկացած կլինի 300-ից ավելի մոդուլային տարածքներից, որոնք պարուրվում են հսկայական սրահի շուրջ՝ ստեղծելով յուրահատուկ էկոհամակարգ: Այն շենք է՝ շենքի ներսում․ էներգաարդյունավետ լուծում, որը միախառնում է փակ տարածքը բացօթյայի հետ:
Համալիրում կտեղակայվեն Թումո լաբերը՝ կրթական անվճար հարթակ, որտեղ ուսանողները և երիտասարդ մասնագետները, համագործակցելով տեղական և միջազգային տեխնոլոգիական ընկերությունների հետ, աշխատում են գիտահետազոտական նախագծերի վրա: Կենտրոնում կգործեն նաև կոնֆերանս դահլիճներ, միջոցառումների հարթակներ, coworking և ուսումնական տարածքներ՝ ինչպես անհատների, այնպես էլ կազմակերպությունների բազմազան կարիքները հոգալու համար: Այս տարածքներում կանցկացվեն լայնածավալ միջոցառումներ, համաժողովներ և համագումարներ: Ուսումնական, ընդհանուր գործածման և coworking տարածքները կլրացնեն կենտրոնի ակադեմիական և արդյունաբերական գործունեությունը։ Ընդհանուր լաբորատորիան հնարավորություն կտա ակադեմիական հաստատություններին և ձեռնարկություններին միավորվել և կիսվել իրենց գիտական և ինժեներական փորձով ու սարքավորումներով:
Համալիրը ներառելու է կրթական և հետազոտական ծրագրեր, կոնֆերանս և ցուցահանդեսային դահլիճներ, աշխատանքային և առևտրային տարածքներ` դառնալով տեխնոլոգիաների և նորարարության հանգույց:
