Ուրվական Այլ․ ուղեցույց

Կազմակերպիչներ

Ուրվականի թիմի առաջին խոշոր միջոցառումը 2019-ի համանուն եռօրյա շլացուցիչ փառատոնն էր Մանկական երկաթուղում, հետո եղավ սինթեզատորային արվեստին նվիրված Synthposium-ը, DāM FunK-ի համերգը, UNTIME ցուցահանդեսը «ՀայԱրտում» և այլ միջոցառումներ, որոնք մշտապես միավորում են կենդանի ու էլեկտրոնային երաժշտությունը, արվեստն ու տեխնոլոգիաները։ 2022-ին նախատեսվում էր մեծ փառատոն Դիլիջանում, բայց այն չեղարկվեց խառը քաղաքական վիճակների պատճառով։ Urvakan Ayl-ը նշանավորում է Ուրվականի վերադարձը։ 

2018 թվականի փառատոնը / լուսանկարը՝ Բիայնա Մահարու

Ծրագիր

Ուրվականի թիմը երկար տարիներ շփվում էր Նիկոլաս Ջաարի հետ և ի սկզբանե նախատեսվում էր մեծ միջոցառում, որը կներառեր ոչ միայն Ջաարի, այլև լեյբլի այլ արտիստների մասնակցությունը։ 2022-ին այն պետք է դառնար դիլիջանյան փառատոնի մի մասը, բայց, ավաղ, իրավիճակը թույլ չտվեց։ 2025-ին  վերադարձան մտքին, հատկապես, որ «Pomegranates» ալբոմը նշում էր իր 10-ամյա հոբելյանը։ Դրա վրա էլ կենտրոնացան։ Այսպիսով, Ջաարը համաձայնեց առաջին անգամ պատմության մեջ կենդանի կատարել հռչակավոր ալբոմը։ Համերգը բացառիկ է նաև կատարողների կազմով․ Նիկոլաս Ջաարին բեմում կմիանա «Գուրջիեֆֆ անսամբլը»՝ Լևոնի Էսքեյանի ղեկավարությամբ, ինչպես նաև երկու մենակատարուհի՝ Ջուլիաննա Բերբերյանն ու Ժաննա Դավթյանը։ 

Հատված «Pomegranates» ալբոմից, ֆիլմ-կոլլաժը՝ Kinoversus-ի

Կարևոր դեր է խաղալու «Retaining The Energy, But Losing The Image» ինստալացիան, որը դառնալու է համերգի անբաժան ու ոչ պակաս տպավորիչ մասը։ 

Երկու օրն էլ ծրագիրը բաղկացած է երկու մասից․ առաջինում, դեռ լույսով, կմնեկնարկի «Pomegranates»-ը, իսկ երկրորդ՝ արդեն ավելի ակումբային մասում, կնվագեն այլ արտիստներ։ Երկրորդ օրվա վերջում խոստանում են մեծ անակնկալ։ 

”Retaining The Energy, But Losing The Image” ինստալացիան / լուսանկարը՝ Urvakan

Տարածք

Ինչպես նշում են կազմակերպիչները, Երևանում մինչ օրս չափազանց դժվար է գտնել նման տեսակի միջոցառումներին հարմար հարթակներ։ Ի վերջո, ընտրությունը կանգ առավ Գրքի պալատի վրա, այն տարածքում, որտեղ ժամանակին տեղակայվել էր The Office ակումբը։ Մոտակայքում է եղել նաև լեգենդար Poligraf-ը, մինչ օրս աշխատում է Tonelab-ը։ Ըստ կազմակերպիչների, այդ պատմական արձագանքը ևս կարևոր խորհուրդ է միջոցառման համար։ Չհաշված Գրքի պալատի պատմական մշակութային շերտը (այստեղ՝ «Հայպետհրատում», օրինակ, աշխատել է Եղիշե Չարենցը):

Գրքի պալատ / լուսանկարը՝ wikipedia.org

Ցերեկային ձևաչափ

Կարևոր պահ․ այս միջոցառումը ոչ թե ակումբային ռեյվ է, այլ ցերեկային հավաքույթ (անգլերեն դրան ասում են gathering), որտեղ կարելի է հաճելի ու հանգիստ օր անցկացնել, շփվել ծանոթների հետ, ծանոթանալ թվային արվեստի հատվածին, տրամադրվել համերգին, հիանալ երաժշտությամբ ու հեռանալ ոչ ուշ գիշերով։ Այս ձևաչափն ընդունված է աշխարհում, Հայաստանում  դրան հաճախ անդրադառնում են, օրինակ, Rambalkoshe-ում։